Business

Header Ads

टाटा पॉवर रिन्युएबल्स: आर्थिक वर्ष २०२७ च्या दुसऱ्या तिमाहीत ८८,३९७ रूफटॉप सोलर आणि ४२६ मेगावॅट-पीक क्षमतेसह अनुक्रमे ३३% व १५% वार्षिक वाढ; पहिल्या सहामाहीत १,६८,००० इन्स्टॉलेशन आणि ८०० मेगावॅट-पीकचा टप्पा पार, अनुक्रमे ५०% व २५% वाढीची नोंद

थोडक्यात पण महत्त्वाचे

देशभरातील निवासी, व्यावसायिक आणि औद्योगिक क्षेत्रातील एकूण रूफटॉप सोलर इन्स्टॉलेशनचा आकडा ५,७५,००० वर; ५.६७ गिगावॅट-पीकपेक्षा अधिक क्षमतेसह देशातील नंबर-१ रूफटॉप सोलर कंपनी म्हणून स्थान अधिक भक्कम

मुंबई, ऑक्टोबर, २०२६ : टाटा पॉवर रिन्युएबल एनर्जी लिमिटेड (TPREL) ची उपकंपनी आणि देशातील पहिल्या क्रमांकाची विश्वासार्ह रूफटॉप सोलर सोल्यूशन्स पुरवणारी कंपनी 'टाटा पॉवर सोलरूफ'ने चालू आर्थिक वर्ष २०२७ च्या दुसऱ्या तिमाहीत (जुलै-सप्टेंबर) शानदार कामगिरीची नोंद केली आहे. या तिमाहीत कंपनीने विक्रमी ८८,३९७ रूफटॉप सोलर संच बसवले असून, मागील आर्थिक वर्षाच्या याच तिमाहीतील ६६,४४७ इन्स्टॉलेशनच्या तुलनेत यात ३३% ची मजबूत वार्षिक वाढ झाली आहे. याच सोबतीने, कंपनीची एकूण स्थापित क्षमता देखील मागील वर्षाच्या ३६९ मेगावॅट-पीकवरून १५% ने वाढून ४२६ मेगावॅट-पीकवर पोहोचली आहे.

चालू आर्थिक वर्ष २०२७ च्या पहिल्या सहामाहीतही कंपनीने उल्लेखनीय कामगिरी केली आहे. इन्स्टॉलेशनमधील दमदार वाढीच्या जोरावर कंपनीने क्षमतेच्या बाबतीत २५% ची शानदार वाढ साध्य केली आहे. पहिल्या सहामाहीत १,६८,५३० पेक्षा अधिक रूफटॉप सोलर बसवण्यात आले असून, मागील वर्षाच्या याच कालावधीतील (१,१२,७२९) तुलनेत हे प्रमाण ५०% अधिक आहे. त्यामुळे एकूण स्थापित क्षमता आता ८०१ मेगावॅट-पीकवर पोहोचली आहे, जी मागील वर्षाच्या याच कालावधीतील ६३९ मेगावॅट-पीकच्या तुलनेत २५% अधिक आहे.

या यशामुळे भारतातील नंबर-१ रूफटॉप सोलर कंपनी म्हणून 'टाटा पॉवर सोलरूफ'चे स्थान अधिक मजबूत झाले आहे. कंपनीचा एकूण इन्स्टॉलेशनचा आकडा आता ५,७५,००० वर पोहोचला असून देशभरातील निवासी तसेच व्यावसायिक व औद्योगिक क्षेत्रांना मिळून एकूण स्थापित क्षमता ५.६७ गिगावॅट-पीकच्या पुढे गेली आहे. 'क्रिसिल'तर्फे सलग १२ वर्षांपासून भारतातील नंबर-१ रूफटॉप सोलर कंपनी म्हणून गौरवण्यात आलेली टाटा पॉवर सोलरूफ बाजारपेठेत आपले अव्वल स्थान टिकवून आहे. हा ऐतिहासिक टप्पा कंपनीचा वेगवान विकास, ग्राहकांचा वाढता विश्वास आणि भारताच्या स्वच्छ ऊर्जा संक्रमणाला गती देण्याप्रती असलेली कटिबद्धता दर्शवतो.

मागील सहा महिन्यांत कंपनीने सर्वाधिक रूफटॉप सोलर इन्स्टॉलेशन उत्तर प्रदेशमध्ये केले असून, तिथे सुमारे १७२ मेगावॅट-पीक क्षमतेसह विक्रमी ४४,०१४ इन्स्टॉलेशन पूर्ण झाले आहेत. या यादीत महाराष्ट्र दुसऱ्या स्थानावर असून, राज्यात सुमारे १०० मेगावॅट-पीक क्षमतेचे २२,१६५ सोलर इन्स्टॉलेशन करण्यात आले. याशिवाय राजस्थानमध्ये ९९ मेगावॅट-पीक क्षमतेच्या २१,२७५ इन्स्टॉलेशनची नोंद केली, तर केरळमध्ये १५,४७७ इन्स्टॉलेशन जोडले असून हे प्रमाण सुमारे ६५ मेगावॅट-पीक स्थापित क्षमतेच्या बरोबरीचे आहे.               

देशातील प्रमुख भौगोलिक क्षेत्रांमध्ये आणि राज्यांमध्ये कंपनीची एकूण वाढ मजबूत कामगिरी दर्शवते. या यादीत उत्तर प्रदेश अव्वल स्थानावर असून, तिथे १,१६,२५४ सोलर इन्स्टॉलेशनसह ५२८ मेगावॅट-पीक एकूण क्षमतेची नोंद झाली आहे. यानंतर महाराष्ट्र दुसऱ्या क्रमांकावर असून, महाराष्ट्रात ७३,५७८ इन्स्टॉलेशन्स करण्यात आली असून एकूण १,०४१ मेगावॅट-पीक क्षमता नोंदवली गेली. केरळने ६९,७३४ इन्स्टॉलेशनची भर घालत ही क्षमता ३१० मेगावॅट-पीकच्या पुढे नेली आहे, तर राजस्थानने ४४,७९८ इन्स्टॉलेशनसह ३९० मेगावॅट-पीक क्षमतेचे योगदान दिले आहे. एकत्रितपणे विचार केल्यास, ही राज्ये कंपनीचा काम करण्याचा वेग आणि क्षमता, संपूर्ण भारतातील तिची मजबूत पकड आणि प्रमुख रूफटॉप सोलर बाजारपेठांमधील सातत्यपूर्ण वाढीचा वेग अधोरेखित करतात.

रूफटॉप सोलर सोल्यूशन्स बसवण्याच्या कामाला गती देऊन 'टाटा पॉवर सोलरूफ' महत्त्वाची भूमिका बजावत आहे. 'प्रधानमंत्री सूर्य घर योजने' अंतर्गत सौर ऊर्जेचा वापर मोठ्या प्रमाणावर वाढवण्याचे भारत सरकारचे व्हिजन कंपनी पुढे घेऊन जात आहे. कंपनी आपल्या 'घर-घर सोलर' या मुख्य मोहिमेद्वारे देशभरातील कुटुंबांमध्ये जनजागृती करत असून सोलर बसवण्याची प्रक्रिया अधिक सोपी करत आहे. ग्राहकांना स्वच्छ आणि परवडणारी ऊर्जा देऊन त्यांना सक्षम बनवणे, हा या उपक्रमाचा मुख्य उद्देश आहे. यामुळे प्रत्येक घरापर्यंत शाश्वत वीज पोहोचवली जाईल आणि देश एका हरित भविष्याकडे वेगाने पावले टाकेल.  

'टाटा पॉवर सोलरूफ'ने निवासी, व्यावसायिक आणि औद्योगिक क्षेत्रांमध्ये आपली मजबूत आणि वैविध्यपूर्ण उपस्थिती निर्माण केली आहे. यामुळे देशभरात रूफटॉप सोलर सोल्यूशन्सचा व्यापक स्वीकार होण्यास मदत मिळत आहे. कंपनी रूफटॉप सोलरसाठी पूर्णपणे एकात्मिक (एंड-टू-एंड) सोल्यूशन्स प्रदान करते. यामध्ये २५ वर्षांच्या वॉरंटीसह हाय-परफॉर्मन्स सोलर मॉड्यूल्स, सुलभ कर्ज पर्याय, विमा सुरक्षा आणि विक्रीपश्चात तत्पर सेवा यांचा समावेश आहे. हा एकात्मिक दृष्टिकोन ग्राहकांना स्वच्छ, अधिक विश्वासार्ह आणि सुरक्षित ऊर्जा पर्याय आत्मविश्वासाने निवडण्यासाठी सक्षम बनवतो.

'टाटा पॉवर सोलरूफ'ची पोहोच संपूर्ण भारतात असून त्यांच्याकडे ७४० पेक्षा अधिक चॅनल पार्टनर्सचे मजबूत नेटवर्क आहे. याच नेटवर्कच्या जोरावर कंपनी देशभरात मोठ्या प्रमाणावर, कोणत्याही अडथळ्याशिवाय आणि पूर्ण विश्वासाने सोलर बसवण्याचे काम करत आहे. रूफटॉप सोलर बसवण्यास उत्सुक असलेले ग्राहक थेट १८०० २५ ७७७७७ या हेल्पलाइन नंबरवर संपर्क साधू शकतात.

Post a Comment

0 Comments